Drífa Snædal, formaður Alþýðusambands Íslands, sagði við DV rétt í þessu að framkoma Icelandair við starfsmenn sína væri „ótrúleg ósvífni og vanvirðing gagnvart starfsfólki sínu og launafólki almennt.“ Drífa segir allt koma til greina í kjölfar ákvörðunar Icelandair, þar á meðal samúðarverkföll.
„Icelandir ætlar þarna uppá sitt einsdæmi að þrýsta niður launum og fara beint í félagslegt undirboð,“ segir Drífa. Icelandair verður jafnframt að svara því hvað félagið eigi við með að „semja við einhverja aðra,“ segir hún. Flugfélagið sagði í tilkynningu sinni fyrr í dag að þeir hyggðust semja við annað félag án þess að tilgreina hvaða félag það væri. Sagði í tilkynningunni: „Félagið gerir ráð fyrir að hefja viðræður við annan samningsaðila á hinum íslenska vinnumarkaði, um framtíðarkjör öryggis- og þjónustuliða hjá félaginu.”
Drífa segir ASÍ muni leita allra leiða til að bregðast við þessu. Sagði hún Alþýðusambandið ætla að beita sér fyrir því að lífeyrissjóðir beiti sér gegn ákvörðun Icelandair. Ennfremur mun ASÍ beita sér gegn hverskyns ríkisaðstoð sem kynni að standa Icelandair til boða. „Við munum gera þá kröfu á stjórnvöld um að þeir bakki ekki upp fyrirtæki sem haga sér svona gagnvart launafólki,“ sagði Drífa.
Ragnar Þór Ingólfsson, formaður VR, hefur áður sagst ætla að beita Lífeyrissjóði verslunarmanna í kjarabaráttu sinna félagsmanna og m.a. beitt sér fyrir því að sjóðurinn fjárfesti ekki í félögum sem borga „ofurlaun“ til sinna stjórnenda. Talsvert fjaðrafok varð um þá ákvörðun, enda ljóst að stjórnir lífeyrissjóða eiga að vera sjálfstæðar í sínum fjárfestingaákvörðunum.
Drífa segist ekki muna eftir fordæmi um svona hegðun fyrirtækis gegn starfsfólki sínu og segir að nú komi allt til greina hjá ASÍ, þar á meðal samúðarverkföll, sem fyrr sagði.
