Háðfuglinn Jim Carrey mætti í viðtal hjá Howard Stern í vikunni þar sem hann opnaði sig um lífið, tilveruna og nýju bókina hans. Bókin sem nefnist Memoirs and Misinformation er skáldsaga byggð á ævi gamanleikarans og skrifuð af honum sjálfum og Dana Vachon.
Í henni er minnst á rúmlega árs langt ástarsamband Jims við leikkonuna Renée Zellweger en þau kynntust við tökur á gamanmyndinni Me, Myself & Irene. Stern kvaðst hafa verið undrandi á að lesa að Renée hafi verið stóra ástin í lífi hans en Jim staðfestir það. „Það er satt og hún var mér ákaflega dýrmæt. Mér finnst hún alveg yndisleg.“
Jim er einhleypur um þessar mundir en hann er tvífráskilinn og á nokkur misheppnuð sambönd að baki. Árið 1987 kvæntist hann Melissu Womer og eignaðist með henni dótturina Erin Jane en hjónabandinu lauk ári 1995.
Ári síðar kvæntist hann Dumb and Dumber mótleikkonu sinni Lauren Holly en þau skildu eftir aðeins tæpt ár. Við tók sambandið við Renée sem lauk árið 2000 og svo nokkur minni ástarævintýri. Það var svo árið 2005 sem hann hóf samband með fyrirsætunni og sjónvarpskonunni Jenny McCarthy sem entist í fimm ár.
Frá 2011 til 2015 átti Jim í stopulu sambandi við förðunarfræðinginn Cathriona White. Þau sáust síðast saman í september 2015 en hún tók eigið líf níu dögum síðar aðeins þrítug að aldri.
Síðan hefur lítið frést af ástarlífi hans fyrir utan stutt samband við leikkonuna Ginger Gonzaga sem lauk í fyrra.
