Í dag greindist íslensk knattspyrnukona í efstu deild með jákvætt sýni í COVID-19 sýnatöku. Hún kom til landsins 17. júní sl. og reyndist sýnataka á landamærum neikvæð. Síðar kom í ljós að hún hafði verið í nánd við smitaðan einstakling erlendis og fór því aftur í sýnatöku. Sú sýnataka reyndist jákvæð. Sem stendur er hún einkennalaus.
Fótbolti.net segir frá því að um sé að ræða hina ungu og efnilegu Andreu Snæfeld Hauksdóttir. „Samkvæmt heimildum Fótbolta.net hefur hún nú greinst með Covid-19 en þar sem málið er kom upp í dag,“ segir í frétt vefsins.
433.is hefur fengið staðfest að Andrea fór í skimun á Keflavíkurflugvelli en fékk þar próf um að hún væri ekki með smit. Hún fékk svo fréttir af smituðum einstaklingi sem hún hafði umgengist í Bandaríkjunum. Hún fór aftur í próf eftir þær fréttir og fékk þar staðfest smit.
Breiðablik vinnur nú í því að greina hverja umræddur leikmaður hitti en markmannsþjálfari og styrktarþjálfari Breiðabliks starfa bæði með karla og kvennaliði félagsins.
Andrea lék með Breiðablik í sigri á KR á þriðjudag og þarf allt lið KR að fara í sóttkví auka allra sem komu nálægt vellinum á þriðjudag.
Allir sem hafa verið útsettir fyrir smiti í samskiptum við hana síðastliðna tvo sólarhringa þurfa að fara í sóttkví í 14 daga. Smitrakning er í gangi en ljóst er að margir þurfa að fara í sóttkví. Málið er í vinnslu og frekari upplýsinga er að vænta á morgun.
Ljóst er að þetta smit setur efstu deild kvenna í uppnám og möguleiki er á því að fjöldi starfsmanna og leikmanna í karlaliði Breiðabliks gæti farið í sóttkví.
