Magn SO₂ í nágrenni Grímsvatna mældist meira í mælingum starfsmanna Veðurstofunnar í síðustu viku en nokkru sinni hefur mælst án þess að gos sé hafið, að sögn Melissa Anne Preffer sérfræðings hjá Veðurstofunni. Segir í tilkynningu að „á þeim tíma sem liðinn er frá gosinu benda aflögunarmælingar til þess að kvika hafi safnast fyrir og þrýstingur í kvikuhólfi aukist.“ Vatnsborð í Grímsvötnum stendur hátt og eru líkur á jökulhlaupi allnokkrar á næstu vikum eða mánuðum.

Síðast gaus í Grímsvötnum árið 2011 og var það öflugt gos. Gosmökkurinn náði um 20 km hæð og samanstóð af fínkorna gjósku sem er bæði létt og svífur vel í lofti. Flug lá niðri í tvo daga á Keflavíkurflugvelli og stöðu Akureyrarflugvallar og Egilsstaðaflugvallar sem varaflugvöllur var ógnað. Hringveginum var lokað um stund við Skaftafell og kennslu var aflýst í grunnskólum víða um suðurland. Að öðru leyti voru áhrif óveruleg, sérstaklega samanborin við áhrif gossins í Eyjafjallajökli árið áður.

Grímsvötn hafa gosið á um 5-10 ára fresti undanfarin ár en síðustu gosin eru áðurnefnt gos 2011, 2004, 1998 og 1996. Samkvæmt þessu er kominn tími á næsta gos.

Á sama tíma er ekkert lát á jarðskjálftahrinu og landris við Þorbjörn á Reykjanesskaganum. Um miðjan maí hófst ókyrrð á svæðinu að nýju og er það til marks um að þriðja kvikuinnskotið sé hafið á þessum slóðum, skv. tilkynningu Veðurstofu. Um 2000 skjálftar hafa mælst síðan jörð tók að rísa þar að nýju og eru skjálftaupptök að langmestu leyti við Þorbjörn, þó einstaka skjálfti eigi upptök sín alveg að Eldey í vestri og austur að Kleifarvatni.

Hafa almannavarnir lýst yfir sérstökum áhyggjum sínum af hreyfingum í Þorbirni og er þar sjálfsagt vísað til nálægðar fjallsins við Grindavíkurbæ, Keflavíkurflugvöll og fjölfarna ferðamannastaða á sunnanverðum Reykjaneshryggnum.