Rósmary Lillýjardóttir Midjord leitar að karlmanni sem hjálpaði móður sinni og ömmu sinni þann 10. júní síðastliðinn. Rósmary segir að maðurinn hafi verið af asískum uppruna og talað íslensku. Hann hjálpaði mæðgunum hjá bensínstöð Orkunnar á Dalvegi.

„Amma fékk hjartastopp í bílnum og mamma þurfti hjálp við að koma henni út úr bílnum til að byrja að hnoða. Það stoppaði enginn nema hann. Hann hjálpaði og passaði mjög vel upp á ömmu mína á meðan mamma var að hnoða hana og bíða eftir sjúkrabíl,“ segir Rósmary.

Litla systir Rósmary var viðstödd og segir hún að maðurinn hafi hjálpað systur hennar að vinna úr áfallinu.

„Mamma hefði aldrei getað gert þetta án hans aðstoðar. Okkur fjölskyldunni langar svo að finna hann til að þakka honum fyrir allt því hann er hetja.“

Amma Rósmary er í öndunarvél. „Lífslíkur hennar voru sagðar litlar í gær og hún er enn í öndunarvél. Hún er smá vöknuð og getur kinkað kolli og hreyft höfuðið, en það er bara biðin,“ segir Rósmary.

Rósmary heldur í vonina að hún finni manninn. Það er hægt að senda henni skilaboð á Facebook um málið.