Sjötíu og fimm sóttu um starf fjölmiðlafulltrúa utanríkisráðuneytisins. Urður Gunnarsdóttir, sem gegnt hefur starfinu frá árinu 2008, mun hverfa til annarra starfa innan ráðuneytisins.

Á meðal umsækjenda eru fjölmargar kanónur úr heimi fjölmiðla, ef svo má að orði komast, en fréttavefur Vísis birti nöfn umsjækjenda í morgun.

Á meðal umsækjenda eru Björn Malmquist, fréttamaður á RÚV, Frosti Logason dagskrárgerðarmaður á X-inu, Hafliði Helgason framkvæmdastjóri og Jakob Bjarnar Grétarsson, blaðamaður á Vísi.

Jóhann Skúli Björnsson, fyrrverandi blaðamaður á DV, og Magnús Geir Eyjólfsson, upplýsingafulltrúi og fyrrverandi ritstjóri Eyjunnar, eru einnig á meðal umsjækjenda eins og Ásta Sigrún Magnúsdóttir, upplýsingafulltrúi og fyrrverandi blaðamaður DV. Eldar Ástþórsson upplýsingafulltrúi, Björn Teitsson blaðamaður, Freyr Rögnvaldsson blaðamaður og Gréta Ingþórsdóttir framkvæmdastjóri eru einnig á listanum.

Fleiri þekktir einstaklingar eru á meðal umsækjenda; þar á meðal Sveinn H. Guðmarsson, fyrrverandi fréttamaður á RÚV og upplýsingafulltrúi Landhelgisgæslunnar og Una Sighvatsdóttir, fyrrverandi blaðamaður á Morgunblaðinu og upplýsingafulltrúi hjá NATO í Afganistan.