Í lok júlí verður par af Air Jordan 1 skóm selt á uppboði. Michael Jordan notaði skóna í leik með Chicago Bulls 1986 og er því um ansi merkilega skó að ræða fyrir þá sem hafa áhuga á körfubolta og notuðum skóm. Reiknað er með að 500.000 dollarar fáist fyrir skóna en það svarar til tæplega 70 milljóna íslenskra króna.

TMZ skýrir frá þessu. Nýlega seldist annað par, þessarar tegundar, fyrir enn hærri upphæð eða 560.000 dollara.

Jordan braut vinstri fót sinn í þriðja leik keppnistímabilsins 1985. Þetta batt næstum enda á feril hans en hann sneri tvíefldur aftur á völlinn sex vikum síðar. Þá hafði Nike framleitt nýja skó fyrir hann, með auka reim til að styðja betur við fótinn. Eftir fyrsta leikinn, þar sem Jordan skoraði 24 stig á 23 mínútum, gaf hann ungum aðdáanda skóna auk eiginhandaráritunar. Nú er þessi ungi aðdáandi, sem er ekki svo ungur lengur, tilbúinn til að selja skóna.