Einar Þorsteinsson, spyrill Kastljóss, hefur fengið á sig töluverða gagnrýni fyrir framgöngu sína gegn Kára Stefánssyni í Kastljósi í gærkvöld. Aðrir telja þó að framganga hans hafi verið góð. Tekist er á um málið undir frétt DV um Kastljóssviðtalið. Einar er fyrst og fremst gagnrýndur fyrir þetta tilsvar: „Þú ert rosalega ruglaður, Kári!“
Einar segir að þetta hafi ekki verið illa meint og eingöngu sagt til að fanga augnablikið. Ummælin féllu í kjölfar þess að Kári sagðist vera búinn að blokka símanúmer Þórólfs Guðnasonar, sóttvarnalæknis.
Yfirlýsing Einars vegna málsins er eftirfarandi:
„Beinar sjónvarpsútsendingar eru mismunandi miklar óvissuferðir. Viðtalið í gær við Kára Stefánsson var nokkuð óvenjulegt en um leið skemmtileg reynsla. Kári er einstakur maður sem talar tæpitungulaust. Það hefur ekki farið fram hjá mér að sumum þykir ég hafa sýnt Kára dónaskap með því að segja „þú ert ruglaður“. Það er vissulega óvenjulegt að segja svona en mér fannst á þessu augnabliki það að blokka símanúmer Þórólfs sóttvarnalæknis einfaldlega dáldið rugluð ákvörðun. En þetta var ekki illa meint. Og ekki sagt nema til að fanga augnablikið sem var svo furðulegt. Við Kári áttum gott spjall fyrir og eftir viðtalið. Ég byrjaði að afsaka mig aðeins fyrir hvað þetta varð óhefðbundið viðtal en Kári stoppaði mig og sagði mér að hætta að afsaka mig, ég hefði ekki gert neitt rangt. Þetta hefði verið gott viðtal.“
