„Stór hópur ungmenna sem voru hætt í neyslu féll í COVIDfaraldrinum og er aftur kominn í neyslu. Þetta er mjög viðkvæmur hópur sem þolir illa að vera ekki í rútínu og fá ekki stuðning.“
Hefur Fréttablaðið eftir Berglindi Gunnarsdóttur, framkvæmdastjóra Foreldrahússins, í umfjöllun um málið í dag.
Fram kemur að erfitt sé að henda reiður á hversu margir hafa snúið aftur í neyslu. Foreldrahúsið lokaði fyrir aðgang í mars og fóru viðtöl fram í gegnum fjarfundabúnað eftir það, allt þar til í byrjun maí þegar opnað var á nýjan leik. Síðan hefur verið mikil ásókn í úrræðið.
„Krakkar sem eru í neyslu láta ekki neinn faraldur trufla sig. Þetta er hópur sem var tæpur fyrir. Það var erfitt að halda þeim í skóla, þau máttu ekki við þessu. Þetta var eins og dyrnar hefðu galopnast inn í vitleysuna. Til þessa hefur tekist að halda þeim frá.“
Er haft eftir Berglindi. Um er að ræða börn og ungmenni frá 12 ára aldri og upp í rúmlega tvítugt.
„Tímabilið frá 18 til 22 ára er mjög erfiður aldur. Þau eru orðin lögráða og því eru ekki úrræði fyrir börn í boði. Þá halda þau gjarnan að það sé hægt að djamma út í hið óendanlega.“
Er haft eftir Berglindi sem sagði að oft hafi samskiptin á heimilinu ekki bætt úr skák, vandamál sem voru þar fyrir hafa aukist og ýtt börnunum frá heimilum sínum og þá hafi þau leitað í vímuefnaneyslu.