Óskar Hrafn Þorvaldsson er með samning við Breiðablik til næstu fjögurra ára en fyrstu tvö árin eru óuppsegjanleg. Þannig þyrfti Breiðablik að borga Óskari laun fram í október 2021 yrði hann rekinn á þessu ári.

Mikil trú er á störfum Óskars í Kópavogi og lagði félagið mikið á sig til að fá hann til starfa frá Gróttu. Hann náði frábærum árangri á Seltjarnarnesi og var eftirsóttur biti.

„Ég er með tvö eru ár sem eru óuppsegjanleg, tvö ár svo áfram. Auðvitað held ég að vera mín hjá Breiðablik verði eins löng og ég stend mig í starfi,“ sagði Óskar Hrafn í samtali við Hjörvar Hafliðason í Dr. Football.

Iðulega eru þjálfara samningar uppsegjanlegir eftir hvert tímabil en Óskar fær öryggi í starfi með þessu. Talsverð pressa er á Óskari enda var Ágúst Gylfason rekinn úr starfi eftir að hafa endað í öðru sæti tvö ár í röð.

„Það hefur enginn gefið mér neitt öryggi að ef við náum ekki árangri að þá sé ég með hreint blað í því, geti lifað án þess að standa mig,“ sagði Óskar Hrafn.