Maður sem ætlaði að mynda spilasal fyrir skömmu var rekinn út úr salnum og honum bent á að myndataka á staðnum væri bönnuð.

Örn Sverrisson, sem segist vera annt um líf og heilsu spilafíkla, segir frá þessu í grein á Vísir.is. Hann er afar ósáttur við að spilastaðir hafi opnað að nýju er slakað var á samkomubanni þann 5. maí. Töluverð umfjöllun hefur verið í fjölmiðlum um það að samkomubannið hafi verið frelsandi fyrir spilafíkla sem hafi fengið kærkomið bindindi og lausn frá fíkn sinni. Örn skrifar:

„Þann 5. maí, daginn eftir að sóttvarnalæknir sem með minnisblaði dagsett 19. apríl lagði til við heilbrigðisráðherra að óhætt væri að opna spilakassa Íslandsspila 4. maí fór ég á spilastað til að fanga ánægju og gleði notanda spilakassa með myndum svona eins og fjölmiðlar sýndu okkur og fjölluðu um daginn áður af gleði og ánægju fólks þegar byrjað var að draga úr samkomubanni.

Í stuttu máli var mér einfaldlega hent út og látinn vita að myndataka væri bönnuð á staðnum.

Auðvitað, ekki er þetta nú alveg sú starfssemi sem þú vilt vera að gorta þig af eða sýna enda eru notendur spilakassa ekki skælbrosandi, notendur spilakassa er veikt fólk í miklum meirihluta. Það fólk sem hefur verið að nota spilakassa til að leggja fram frjáls framlög til Rauða krossins, Landsbjargar og SÁÁ sem eru eigendur Íslandsspila voru EKKI að bíða eftir opnun spilakassa.“

Örn bendir á að meðal annars sundstaðir og líkamsræktarstöðvar hafi ekki fengið að opna 5. maí. Rétt er að halda því til haga að þau lýðheilsusjónarmið sem Almannavarnanefnd styðst við varðandi tilslakanir á samkomubanni snúast um smithættu af kórónuveirunni en ekki önnur lýðheilsusjónarmið. Örn sakar eigendur Íslandsspila, sem reka spilakassana, um græðgi:

„Samfélagsleg ábyrgð eiganda Íslandsspila hefði verið svo töff, svo falleg ef þeir hefðu ákveðið að ekki væri tímabært að opna spilakassanna og haldið þeim lokuðum áfram í einhvern tíma jafnvel þó að sóttvarnalæknir og heilbrigðisráðherra hafi gefið grænt ljós.

Nei, í staðinn létu Íslandsspil gera fyrir sig sprittbrúsa merkta Íslandsspil og einhverjar leiðbeiningar um að notendur spilakassa ættu að þrífa þá og sjálfan sig fyrir notkun. Getur græðgin tekið á sig aumari mynd?“