Gunnar Rúnar Sigurþórsson var rekinn úr vinnu hjá Hafnarfjarðarbæ eftir aðeins þrjá daga í starfi. Ástæða uppsagnarinnar er sögð vera kvartanir frá öðrum starfsmönnum. Formaður Afstöðu, félags fanga segir brotið á mannréttindum Gunnars. Þetta kom fram í kvöldfréttum Stöðvar 2.
Gunnar Rúnar var árið 2011 dæmdur í 16 ára fangelsi fyrir að bana Hannesi Helgasyni.
Gunnari Rúnari hefur gengið illa að fá vinnu, en hann afplánar nú hluta refsingar sinnar á Vernd og er skilyrði fyrir afplánun þar að íbúar séu með vinnu. Hefur hann þurft að vera í sjálfboðavinnu þar til hann fékk tækifæri frá Hafnarfjarðarbæ. Hins vegar var hann rekinn eftir aðeins þrjá daga þar sem starfsmenn höfðu tilkynnt að þeir kærðu sig ekki um að vinna með honum.
Guðmundur Ingi Þóroddsson, formaður félags fanga segir Gunnar vilja vinna og taka þátt í samfélaginu en fái ekki tækifæri til þess. Með því að slíta ráðningarsambandi við Gunnar sé hann rændur þessum möguleika og bæjarfélagið sekt um fordóma og útskúfun.
„Menn vilja koma út og sanna sig og sýna að það sé hægt að treysta þeim og hefja nýtt líf. „Að okkar meti þá var brotið gegn mannréttindum á þessum manni og við treystum því að bæjarfélagið bæti það tjón,“ segir Guðmundur.
Rósa Guðbjartsdóttir, bæjarstjóri Hafnarfjarðar, gat ekki tjáð sig annað en að segja að málið væri í skoðun innan sveitarfélagsins.
