Á sjötta tímanum í gær var ekið á 12 ára dreng í Garðabæ. Hann var fluttur með sjúkrabifreið á slysadeild. Talið var að hann hefði fótbrotnað. Á ellefta tímanum í gærkvöldi datt hjólreiðamaður af hjóli sínu eftir að köttur hljóp í veg fyrir hann með þeim afleiðingum að honum fipaðist við hjólreiðarnar. Maðurinn var illa áttaður eftir slysið og kvartað undan verkjum í öxl og brjóstkassa. Hann var fluttur með sjúkrabifreið á slysadeild.

Um klukkan 21 var akstur bifhjólamanns stöðvaður á Vesturlandsvegi við Suðurlandsveg eftir að hraði hans mældist 164 km/klst en leyfður hámarkshraði þar er 80 km/klst. Ökumaðurinn var fluttur á lögreglustöð og sviptur ökuréttindum til bráðabirgða.

Fjórir ökumenn voru handteknir í gærkvöldi og nótt grunaðir um að vera undir áhrifum fíkniefna. Þrír þeirra reyndust vera annað hvort sviptir ökuréttindum eða án ökuréttinda.

Síðdegis í gær var tilkynnt um þjófnað á tveimur reiðhjólum úr læstri geymslu í fjölbýlishúsi í Hafnarfirði. Málið er í rannsókn.