Kynningarfundur ríkisstjórnarinnar á aðgerðum vegna COVID-19 fór fram síðastliðin þriðjudag. Þar kynnti Ríkisstjórnin vægari aðgerðir sem ganga munu í garð fjórða maí.
Eftir fundinn hafa margir lýst áhyggjum sínum yfir því að Íslendingar séu að farnir slaka of mikið á því að framfylgja fyrirmælum Almannavarnadeildar lögreglu. Þetta á meðal annars að sjást í aukinni kaupgleði Íslendinga.
Í dag birtist ljósmynd á Facebook-síðunni COSTCO-gleði sem virðist sýna að fólk sé ekkert endilega að virða tilsettar reglur um nálægð eða fjölda í verslunum. Myndin á að vera tekin í verslun Costco í dag.
Færslan hefur vakið mikla athygli, en margir hefa látið ummæli falla við myndina.
„Íslendingar kunna sér ekki hóf i neinu, því miður.“
„Covid 19 mun blossa upp aftur. Því fólk er FÍFL.“
Þá hafði DV samband við starfsmann Costco sem staðfesti að gríðarlegur fjöldi væri í búðinni, miklu meiri en seinustu daga. Þá hefur DV einnig heimildir fyrir því að talið hafi verið inn í búðina, en vegna stærðar verslunarinnar er ekki miðað við tuttugu manns líkt og annars staðar
Þá greindi útvarpsmaðurinn Heiðar Austmann frá því að mikið væri um að vera í Smáralindinni, þar væru flest bílastæði í notkun.
„ÖLL bílastæði á neðri hæð Smáralindar full!! 70% stæða upptekin fyrir aftan hús. Erum við ekki farin að slaka fullmikið á?“
DV hafði samband við Tinnu Jóhannsdóttur, markaðsstjóra Smáralindarinnar. Hún sagði að í rauninni væri ekki svo mikið að gera, þó að biðraðir myndist stundum fyrir framan verslanir.
„Mér finnst nú ekkert vera brjálæðislega mikið. Búðirnar hafa verið duglegar að fylgja tuttugu manna reglunni og svoleiðis þannig að það myndast alveg biðraðir við inngangana og þannig. En ég get ekki séð að það sé eitthvað brjálæðislega mikið í húsinu og þannig“
„Það eru fáir sem eru að fara í búðirnar í einu þannig að það virðist kannski vera meira að gera en er í rauninni.“
Tinna sagðist ekki geta fullyrt um fjöldann í búðinni að svo stöddu, en hún var alls ekki viss um að í dag væri fjölmennasti dagurinn eftir að samkomubannið kom.
„Þetta er bara svipað eins og það hefur verið. Mér finnst ekki eins og að fólk sé að missa sig, alls ekki.“
