Gunnlaugur Jónsson er hvað þekktastur hér á landi fyrir afrek sín sem knattspyrnumaður. Harðjaxlinn frá Akranesi gerði það gott hér á landi í atvinnumennsku og með íslenska landsliðinu. Síðustu ár hefur hann starfað í heimi fótboltans en einnig í fjölmiðlum. Útvarpsþættir hans um íslenska tónlist á RÚV hafa notið vinsælda en undanfarin misseri hefur hann framleitt sjónvarpsþætti fyrir Sjónvarp Símans undir nafninu Áskorun.

Í þáttunum er rætt við afreksfólk í íþróttum sem hefur með einstöku hugarfari og þrautseigju sigrast á ólíkum áskorunum í gegnum lífið, innan vallar og utan. Fólk heima í stofu fær að sjá hliðar, sem fáir ef nokkrir þekkja, að baki sögum sem flestir hafa heyrt; kynnast manneskjunni undir búningnum. Rætt er við samstarfsfólk, fjölskyldu og vini og kafað undir yfirborðið í sögu hvers og eins. „Þetta á sér langan aðdraganda. Ég fékk hugmyndina í byrjun árs 2018 en þá var ég atvinnulaus. RÚV var með Heimsmeistaramótið þetta árið og hafði ekki pláss fyrir meira efni. Stöð 2 tók mér svo ekkert sérstaklega vel, ég fékk ekki fundinn sem mér var lofað. Það æsti upp í mér að láta til skarar skríða. Ég fékk fund með Sagafilm sem tók vel í hugmyndina. Það tekur allt lengri tíma í sjónvarpi en útvarpi svo það fór hálft ár í að fá sjónvarpsstöð að borðinu til að hefja framleiðslu. Upptökur hófust í upphafi árs 2019 og hefur þetta því verið langt ferli,“ segir Gunnlaugur sem uppsker nú ríkulega þar sem þættirnir eru komnir í efnisveitu Símans.

Flúði land eftir að hafa komið út úr skápnum
Þættirnir í þessari syrpu eru fimm en saga Inga Þórs Jónssonar er saga sem fáir þekkja. „Hann fer á Ólympíuleikana 1984 og keppir í sundi. Hann er ekki kominn út úr skápnum þá. Eftir leikana kemur hann út úr skápnum sem hommi en fer í raun inn í skápinn sem íþróttamaður. Hann skammaðist sín fyrir að vera íþróttamaður og hætti eftir leikana og flutti af landi í brott. Gerðist flugþjónn og það tók hann tuttugu ár að koma til baka sem íþróttamaður,“ segir Gunnlaugur um sögu Inga. Aðrir viðmælendur eru Elísabet Gunnarsdóttir, Tryggvi Snær Hlinason, Guðmundur Þ. Guðmundsson og Evrópumeistaralið Gerplu.

Á góðum stað eftir að hafa sagt upp á síðasta ári
Gunnlaugur var þjálfari Þróttar í knattspyrnu en sagði starfi sínu lausu fyrir rúmu ári, hann hafði of margt á sinni könnu. Gunnlaugur var greindur með geðhvarfasýki 18 ára gamall. Sjúkdómurinn fór að gera vart við sig á meðan hann var í starfi hjá Þrótti.

„Það náðist að finna jafnvægi með tímanum. Það hefur sýnt sig að þetta var hárrétt ákvörðun. Þetta var of mikið, að vera í vinnslu á þessum þáttum og að þjálfa fótboltalið. Ég hef náð stöðugleika, sem
maður hefur leitað eftir. Það er gott stand á mér í dag, við stefnum á að halda því áfram.“

Ásamt því að starfa í fjölmiðlum er Gunnlaugur íþrótta- og verkefnastjóri Gróttu en langar þennan kraftmikla Skagamann að fara aftur í þjálfaraúlpuna? „Mig klæjar ekkert í puttana, það hefur verið falast eftir því að ég hjálpi til í yngri flokkum. Það yrði á mínum forsendum, í augnablikinu er hún ekki hávær þessi ástríða fyrir þjálfun. Hún blundar þarna undir niðri og maður útilokar ekkert.“