Lögreglan á höfuðborgarsvæðinu stöðvaði ökumann fyrir að aka sviptur ökuréttindum og undir áhrifum áfengis rétt fyrir klukkan 20 í gærkvöldi. Í skeyti frá lögreglunni um verkefni gærkvöldsins og næturinnar kemur fram að ungbarn hafi verið í bílnum. Barnavernd var gert viðvart um málið.
Að öðru leyti var tiltölulega rólegt hjá lögreglu en venju samkvæmt voru þó nokkrir ökumenn teknir úr umferð af ýmsum ástæðum. Þrír voru undir áhrifum fíkniefna og þar af var einn sviptur ökuréttindum. Þá var einn ökumaður til viðbótar stöðvaður vegna ölvunaraksturs. Þá hafði lögregla afskipti af manni rétt fyrir klukkan fjögur í nótt en sá var með lítilræði af fíkniefnum á sér. Málið var afgreitt með skýrslutöku á lögreglustöð.
