Sigurbjörg Erla Egilsdóttir, bæjarfulltrúi Pírata í Kópavogi, vill að yfirvöld í Kópavogi bregðist við hrottafullri árás unglinga á ungan dreng fyrir skömmu, en myndskeið af barsmíðunum fór í dreifingu á samfélagsmiðlum. Sigurbjörg vill að bæjaryfirvöld grípi til aðgerða gegn ofbeldi. Hún hefur sent eftirfarandi fréttatilkynningu til fjölmiðla um málið:
„Í síðustu viku fór í dreifingu myndskeið af hrottafenginni árás á fjórtán ára dreng við biðstöð Strætó í Hamraborg í Kópavog þar sem hann sætti barsmíðum af hendi hóps sér eldri unglingspilta. Málið hefur eðlilega vakið óhug, og valdið óöryggi meðal barna sem upplifa sig ekki lengur örugg á svæðinu.
Sigurbjörg Erla Egilsdóttir, bæjarfulltrúi Pírata, gerði árásina að umræðuefni á fundi bæjarstjórnar í Kópavogi í dag og kallar eftir viðbrögðum bæjaryfirvalda sem bera ábyrgð. Það þarf að senda skýr skilaboð um að þessi hegðun sé alls ekki í lagi og gera allt til þess að koma í veg fyrir frekara ofbeldi. Sigurbjörg Erla hefur því sent erindi til bæjarráðs með tillögu þess efnis að Kópavogsbær hefji átak gegn einelti og ofbeldi meðal ungmenna. Jafnframt vill hún kalla til fulltrúa frá lögreglunni til þess að ræða verklag þeirra þegar upp koma mál sem varða ofbeldi og mismunun meðal ungmenna.
Barnasáttmáli Sameinuðu þjóðanna leggur þá skyldu á stjórnvöld að hafa virkar ráðstafanir til að greina og bregðast við tilfellum þar sem barn hefur sætt illri meðferð. Kópavogsbær er þar ekki undanskilinn og ber skyldu til að bregðast við með viðeigandi ráðstöfunum.“
