Almannavarnadeild ríkislögreglustjóra mælir ekki gegn ferðum til Tenerife, en eins og fram hefur komið í fréttum greindist veiran í ítölskum manni sem dvelur á sama hóteli og hópur Íslendinga.
Í stöðuskýrslu almannavarna vegna Covid-19 kórónaveirunnar kemur fram að ekki séu vísbendingar um að tilfellin séu fleiri og veiran hafi breiðst út á Tenerife.
„Að sinni er því ekki mælt gegn ferðum til Tenerife. Hins vegar er brýnt að þeir sem annað hvort eru á svæðinu eða hyggja á ferðalög þangað hugi vel að persónulegu hreinlæti og fylgi fyrirmælum heilbrigðisyfirvalda á svæðinu. Þegar komið er heim til Íslands er nauðsynlegt að fylgja fyrirmælum íslenskra heilbrigðisyfirvalda sem uppfærð eru reglulega og birt á vef embættis landlæknis,“ segir í skýrslunni.
Tekið er fram að enginn hafi greinst á Íslandi en 35 sýni verið rannsökuð sem öll reyndust neikvæð. Þá er bent á áhættumat Sóttvarnastofnunar Evrópu þess efnis að líkurnar aukist á að veiran dreifi sér um Evrópu frá öðrum löndum en Kína. Ísland er þar engin undantekning.
