Lögreglan rannsakar nú líkamsárásina sem átti sér stað í Hamraborg í Kópavogi í síðustu viku. Fjallað var um árásina í gær en hópur unglinga réðst á fjórtán ára dreng með höggum og spörkum í Hamraborginni í síðustu viku. Árásin var tekin upp á myndband en það hefur verið í dreifingu á samfélagsmiðlum.

Lögreglan á höfuðborgarsvæðinu greinir frá því á Facebook-síðu sinni að þegar hún kom á vettvang voru árásarmennirnir farnir. Lögreglan hitti þó þann sem varð fyrir árásinni en hann var fluttur á slysadeild þar sem að um grófa árás var að ræða.

RÚV fjallaði um málið í kvöldfréttum sínum í gær en þeir birtu afar óhugnanlegt myndband sem tekið var upp af árásinni. Í myndbandinu má sjá unglingana ráðast á drenginn en lögreglan segir að myndbandið verði notað við rannsókn málsins. Þá telur lögreglan sig hafa nokkuð skýra mynd af atburðarásinni.

Faðir drengsins segir að sonur sinn sé ennþá að jafna sig eftir árásina en hann glímir við hausverk og uppköst vegna hennar. Faðirinn telur að það sé mögulegt að ástæða árásinnar sé útlendingaandúð en hann er af erlendum uppruna. Faðirinn segir árásarmennina vera á aldrinum 15 til 17 ára.

Þeir sem urðu vitni að árásinni, eða búa yfir vitneskju henni tengdri, eru beðnir um að hafa samband við lögreglu, en upplýsingum má koma á framfæri í einkaskilaboðum á fésbókarsíðu Lögreglunnar á höfuðborgarsvæðinu eða í tölvupósti á netfangið heimir@lrh.is