Arngrímur Brynjólfsson, fyrrrverandi skiptstjóri á skipinu Heineste, sem er í eigu Samherja, var sannfærður um sakleysi sitt er fiskistofa Namibíu vændi hann um ólöglegar veiðar fyrir innan 200 metra fiskveiðilögsögu Namibíu. Tiltæk gögn um borð í skipinu ættu að segja aðra sögu. Hann taldi víst að málið myndi leysast fljótlega. En tvær grímur runnu á Arngrím er vegabréfið var tekið af honum og honum var gert eyða nótt á lögreglustöðinni.
Þar hitti Arngrímur fyrir mann sem hafði gist í lögreglustöðinni í eitt og hálft ár. Mál þessa manns var enn til rannsóknar. Arngrímur velti því fyrir sér hvort sömu örlög biðu hans – hvort rannsókn á máli hans myndi dragast úr hömlu og hann yrði í varðhaldi á meðan.
Arngrímur fór yfir málið í viðtali á sjónvarpsstöðinni N4 í gærkvöld. Viðtalið má sjá í spilaranum hér fyrir neðan.
Málið átti að taka fyrir í hæstarétti Namibíu þann 30. janúar. Daginn áður var fundur með saksóknara og lögmönnum Arngríms. Þar kom fram að ef Arngrímur neitaði sök og ekki yrði dómsátt myndi saksóknari þurfa að taka sér tíma til nánari rannsóknar málsins. Arngrímur sá þá fyrir sér þá martröð að verða fastur í Namibíu, vegabréfslaus, um ótiltekinn tíma. Í fyrstu gat hann ekki hugsað sér að játa, þar sem hann taldi sig saklausan, en af þessum ástæðum tók hann þann kostinn að játa sök, greiða sekt og losna frá málinu.
Í viðtalinu kemur einnig fram að saksóknari reyndi að tengja málið við ásakanir á hendur Samherja um mútugreiðslur fyrir fiskveiðikvóta. Arngrímur telur fráleitt að tengja þau mál saman og var dómari í málinu honum sammála.
