Tæplega þrítug kona hefur verið ákærð fyrir meiri háttar brot gegn skattalögum og fyrir peningaþvætti. Aðalmeðferð í málinu fyrir Héraðsdómi Reykjavíkur verður þann 9. mars næstkomandi.
Konan gerði ekki grein fyrir háum millifærslum frá móður sinni inn á reikning hennar, sem og háum innborgunum í reiðufé á reikning hennar. Vanframtaldar tekjur konunnar á árunum 2015 til 2017 nema samtals rúmlega 32 milljónum króna og vangreiddur skattur er yfir 13 milljónir.
Ekkert kemur fram í ákærunni um með hvaða hætti konan kann að hafa aflað sér þessara miklu tekna. Konan er bæði sökuð um að hafa komið sér hjá því að greiða tekjuskatt af háum tekjum og að hafa nýtt sér ávinning af brotum.
Ákærandi í málinu er héraðssaksóknari sem krefst þess að konan verði dæmd til refsingar og til greiðslu alls sakarkostnaðar.
