Lögreglan á höfuðborgarsvæðinu kærði fimm ökumenn fyrir hraðakstur á Gullinbrú í gærkvöldi. Lögregla var þar við eftirlit drjúgan hluta kvöldsins, eða frá 19:30 til 21:40. Þar að auki var einn ökumaður kærður fyrir að nota farsímann undir stýri.
Gærkvöldið var þó tíðindalítið hjá lögreglunni á höfuðborgarsvæðinu. Tveir ökumenn voru þó stöðvaðir á Vesturlandsvegi, annar klukkan 22 en hinn klukkan tvö í nótt. Sá fyrri reyndist aka bifreið sinni sviptur ökuréttindum en sá síðari er grunaður um akstur undir áhrifum fíkniefna. Lögregla stöðvaði einnig ökumann í Árbænum en sá var sviptur ökuréttindum. Um ítrekað brot er að ræða.
Loks var einn ökumaður stöðvaður í Hafnarfirði eftir miðnætti. Hann er grunaður um akstur undir áhrifum fíkniefna og ítrekaðan akstur sviptur ökuréttindum.
