Verkfall ófaglærðra starfsmanna hjá Reykjavíkurborg hefst í fyrramálið. Um er að ræða ótímabundið allsherjarverkfall sem tekur meðal annars til sorphirðufólks og starfsfólks á leikskólum. Enginn samningafundur hefur verið boðaður í dag.

Í samtali við RÚV segist Sólveig Anna Jónsdóttir, formaður Eflingar, óttast langt verkfall:

„Ef samninganefnd Reykjavíkurborgar og þeir sem fara með völd í borginni fara ekki að átta sig á alvarleika stöðunnar og þeirri miklu ábyrgð sem þau svo sannarlega bera, já þá óttast ég það að þetta verkfall verði langt,“ segir Sólveig Anna.

Sorphirða hefur farið fram í fimm hverfum borgarinnar í dag vegna verkfallsins á morgun.