Búið er að fella dóm í meiðyrðamáli blaðamannsins og fyrrverandi ritstjórans Reynis Traustasonar gegn Arnþrúði Karlsdóttur, útvarpsstjóra á Útvarpi Sögu. Reynir vann málið og er Arnþrúði gert að greiða honum 300 þúsund krónur í miskabætur. Þá þarf Arnþrúður einnig að greiða 1,1 milljón króna í málsvarnarlaun lögmanns Reynis eða tæplega fjórfalda upphæð miskabótanna.

„Hvað heldurðu að hann hafi mörg mannslíf og fjölskylduhamingju á samviskunni, bæði frá því sem ritstjóri DV og ritstjóri Stundarinnar og þá stjórnarformaður Stundarinnar?“ voru ein ummælana sem Arnþrúður sagði en Reynir fór fram á að þau, ásamt tveimur öðrum, yrðu dæmd ómerk og dauð. Ummælin sem tekist er á um lét Arnþrúður falla í símatíma Útvarps Sögu í byrjun desember árið 2018 þar sem rætt var um Klaustursmálið. Hin ummælin sem um ræðir má sjá hér fyrir neðan.

„Hvað heldurðu að hann hafi mörg mannslíf á á á samviskunni þar sem hann hefur lagt heilu fjölskyldurnar og fólk í rúst út af athugasemdakerfum sem hann lét með lygafréttum sem að eru framleiddar?“

„Hvað heldurðu að séu margir, sem eru búnir að gráta úr sér augun yfir lygunum í þeim?“

Reynir fór fram á að fá 1,5 milljón í miskabætur vegna ummælana en eins og áður segir þá fékk hann aðeins 300 þúsund krónur. Þó er ekki víst að hann sé ósáttur með það þar sem hann sagði í samttali við blaðamann DV í janúar að peningarnir væru ekki aðalatriðið. „Ég vænti þess að þessi orð verði dæmd ómerk og þá er tilganginum náð. Peningarnir skipta mig minnstu máli,“ sagði Reynir. „Aðalatriðið er að maður  nái að verja æru sína fyrir öllum þessum ósköpum. Ég vil fá úrskurð um að ég sé ekki morðingi og ég hafi ekki falsað fréttir. Þá erum við bara góðir,“