Aðfaranótt sunnudags setti flugvél frá British Airways hraðamet þegar henni var flogið frá New York til Lundúna. Flugið tók aðeins 4 klukkustundir og 56 mínútur. Aldrei fyrr hefur farþegaflugvél, sem ekki flýgur hraðar en hljóðið, farið svo hratt yfir Atlantshafið. Flugtíminn var tæplega tveimur klukkustundum skemmri en venja er á þessari flugleið.

Flugvélin, sem er Boeing 747 vél, naut góðs af storminum Ciara, sem herjaði á Bretlandseyjar og meginland Evrópu um helgina, og hagstæðum háloftastraumum. Á leiðinni náði vélin mest 1.327 km/klst.

Vél frá Virgin Atlantic flaug þessa sömu leið þessa nótt og var mínútu lengur á leiðinni.

Rétt er að taka fram að hinar sögufrægu Concord þotur, sem flugu hraðar en hljóðið, fóru þessa sömu flugleið á mun skemmri tíma en 2003 var vél af þeirri tegund flogið þessa leið á 2 klukkustundum og 53 mínútum.