„Staðan er miklu mun alvarlegri ef marka má heimildir frá íbúum á svæðinu. Hvað er í gangi hér að við séum ekki búin að loka algjörlega fyrir komu kínverskra ferðamanna til landsins á meðan þessar hörmungar ganga yfir,“ segir Inga Sæland, formaður Flokks fólksins.
Inga hefur miklar áhyggjur af útbreiðslu kórónaveirunnar en tæplega 30 þúsund manns hafa nú smitast af veirunni í Kína. Tala látinni hækkar samhliða fleiri tilfellum veirunnar en í morgun voru 565 dauðsföll staðfest. Langflest tilvikin hafa greinst í Kína og þá einna helst í Hubeihéraði þar sem Wuhan er stærsta borgin.
„Kínverski sendiherrann hér á landi aflýsti áður boðaðri nýársgleði hérlendis strax og vitað var um veiruna. En íslensk stjórnvöld sitja og bíða, sjá bara til,“ segir Inga í færslu á Facebook-síðu sinni.
Þórólfur Guðnason sóttvarnalæknir segir við Morgunblaðið í dag að mælst sé til þess að Íslendingar sem koma frá Kína fari í 14 daga sóttkví. Rætt hafi verið hvort beita ætti sömu aðferð við erlenda ferðamenn en það hafi reynst erfitt í framkvæmd. Ferðamenn frá Kína séu beðnir um að vera í sóttkví í 14 daga ef þeir veikjast og svipuðum aðferðum hafi verið beitt í öðrum löndum.
„Við sjáum að árangur er að nást t.d. í Evrópu. Það er ekki mikið um útbreiðslu frá þessum tilfellum sem hafa greinst,“ sagði Þórólfur í Morgunblaðinu í dag.
