Brottvísun pakistanska drengsins Muhammed Khan og fjölskyldu hans hefur verið frestað. Hið sama gildir um aðrar barnafjölskyldur sem hafa verið á Íslandi í meira en sextán mánuði. Fjölskylda Muhammeds sótti um hæli hér í lok árs 2017.

Frá þessu var greint meðal annars frá á RÚV en í dag var haldinn samstöðufundur í Vesturbæjarskóla fyrir Muhammed og fjölskyldu hans. Muhammed er nemandi við skólann og var fullt út úr dyrum. Má þess einnig geta að hann átti sjö ára afmælisdag í gær.

Hermt er að þingmannanefnd um málefni útlendinga hafi fundað fyrir helgi um stöðu barna og fólks í viðkvæmri stöðu. Dómsmálaráðherra hefur falið nefndinni að fylgja þeirri vinnu áfram eftir.

Í yfirlýsingu á vef dómsmálaráðuneytisins sem birtist í dag segir að samkvæmt lögum um útlendinga sé heimilt að veita útlendingi dvalarleyfi á grundvelli mannúðarsjónarmiða að tilteknum skilyrðum uppfylltum, hafi hann sótt um alþjóðlega vernd og ekki fengið niðurstöðu í máli sínu á stjórnsýslustigi innan 18 mánaða. Athygli dómsmálaráðherra hafi nýlega verið vakin á því að í einstökum málum geti tíminn orðið óhæfilega langur.