Nokkur börn hafa fengið dularfullar sendingar uppfullar af kristilegu áróðursefni frá nafnlausum sendanda. Frá þessu segir Ásta F. Flosadóttir, skólastjóri og sauðfjárbóndi, en barn hennar hefur fengið slíka sendingu. Frá þessu greinir Fréttablaðið.

Sonur Ástu hafði svarað nokkrum spurningum hjá Bændablaðinu og í kjölfarið birtist lítil grein í blaðinu þar sem að hægt var að sjá heimilisfang hans. Sá einstaklingur sem sendi bréfið hefur nýtt sér það og límdi meira að segja úrklippu með mynd af drengnum á póstinn.

„Ég veit um fjögur önnur börn sem að hafa fengið slíkar sendingar. Ég reikna með því að þau séu fleiri og ritstjóri Bændablaðsins hringdi í mig í gær og lét mig vita að hann ætlaði að athuga hvort þau séu fleiri og ræða við foreldrana,“

Á mynd sem sést í frétt Fréttablaðsins má sjá að í póstinum er að finna DVD-disk og bók sem myndu í flestum kringumstæðum flokkast sem áróðursefni.

„Ég vil að þú vitir að þessi sending er svo sannarlega ekki þegin með þökkum. Að senda börnum nafnlausar sendingar vegna þess eins að þau svara til gamans nokkrum spurningum fyrir Bændablaðið er bara óhugguleg hegðun. Vonandi er tilgangur þinn góður en við afþökkum svo sannarlega svona lagað inn á þetta heimili,“

„Hér er til nóg af biblíum og þær eru meira að segja lesnar og við frá-biðjum okkur allan trúarlegan áróður og kristniboð. Þetta er afbrigðileg hegðun og verður tilkynnt til lögreglunnar á morgun,“

Fréttablaðið hafði samband við Tjörva Bjarnason, útgefanda Bændablaðsins sem segir að blaðið tengist umræddum sendingum ekki á neinn hátt.