Jarðvísindamenn hittust á vísindaráðsfundi almannavarna í dag. Þar var farið yfir stöðu mála vegna landriss og jarðskjálftavirkni í grennd við fjallið Þorbjörn á Reykjanesskaga. Þar kom fram að jarðskjálftavirkni heldur áfram á svæðinu auk þess sem jarðskjálftavirknin dreifist á nokkrar sprungur norður af Grindavík.
Þá er verið að bæta þremur nýjum jarðskjálftamælum við rauntímavöktun Veðurstofunnar og tveir í viðbót verða settir upp á næstu dögum. Helsti tilgangur þessara mæla er að bæta áreiðanleika jarðskjálftastaðsetninga.
Í tilkynningu frá Almannavarnadeild ríkislögreglustjóra segir að landið við Þorbjörn sé enn að rísa en landrisið er um 3-4 sentimetrar þar sem það er mest. Veðurstofan hefur sett upp þrjá nýja GPS mæla á svæðinu. Niðurstöðurnar sem fengist hafa benda til að risið eigi upptök sín á um 4 kílómetra dýpi en töluverð óvissa er enn á dýpi þenslumiðju. Merkin sem sjást eru til samræmis við að kvika sé að safnast fyrir í jarðskorpunni. Líkanreikningar benda til að rúmmál hennar sé nú 1-2 milljón rúmmetrar. Of snemmt er að útiloka aðrar skýringar en kvikuinnskot þykir sú líklegasta. Engin áhrif kviku hafa komið fram í jarðhitakerfi Svartsengis.
Gas- og efnamælingar í jarðhitavökva hafa verið auknar á jarðhitasvæðinu við Svartsengi og Eldvörp í samstarfi við HS-orku. ÍSOR vinnur að þyngdarmælingum til að kanna og fylgjast með mögulegum breytingum í jarðskorpunni.
Á fundinum var rýnt í þær sviðsmyndir sem liggja fyrir og reynt að draga fram þá þætti sem þarf að kanna betur. Sviðsmyndirnar voru bornar saman við þekkta atburði á Íslandi og annarsstaðar.
Vísindamenn frá Veðurstofu Íslands, Jarðvísindastofnun Háskólans, Ísor ásamt fulltrúar frá almannavarnadeild ríkislögreglustjóra, HS-Orka, Umhverfisstofnun og lögreglan á Suðurnesjum sátu fundinn.
