Héraðsdómur Reykjavíkur hefur dæmt karlmann í átta mánaða óskilorðsbundið fangelsi fyrir að aka ítrekað undir áhrifum áfengis.

Samkvæmt ákæru var maðurinn, Arkadiusz Lech Ustaszewski, tekinn ölvaður undir stýri þann 1. febrúar í fyrra. Hann var svo aftur gómaður 2. maí, 14. maí, 1. júní, 8. júní og 6. ágúst.

Í tvö skipti reyndi maðurinn að komast undan lögreglu á hlaupum en var gómaður í bæði skiptin. Þann 2. maí ók hann gegn rauðu ljósi við Suðurfell, öfugu megin við umferðareyju við Æsufell, áfram norður Vesturberg þar sem hann fór út úr bifreiðinni. Hann hljóp á brott en var handtekinn skömmu síðar.

Þann 8. júní í fyrra gaf lögregla honum svo merki um að stöðva bifreið sína í Árbæ. Hann hlýddi ekki fyrirmælum lögreglu og ók austur Rofabæ uns hann fór út úr bifreiðinni og hljóp á brott. Hann náðist skömmu síðar.

Í dómi kemur fram að maðurinn hafi oft komist í kast við lögin á undanförnum árum. Með brotum sínum í fyrra rauf hann skilorð þrettán mánaða dóms sem hann hlaut í maí 2018. Var hann dæmdur í átta mánaða fangelsi og er dómurinn óskilorðsbundinn. Þá var áréttuð ævilöng ökuréttarsvipting mannsins.