Snjóflóð féll í Móskarðshnjúkum í Esjunni í hádeginu og er talið að tveir hafi lent í flóðinu. Frá þessu er greint á vef RÚV sem segir að allar björgunarsveitir á höfuðborgarsvæðinu hafi verið kallaðar út sem og þyrla Landhelgisgæslunnar.

Ásgeir Þór Ásgeirsson, yfirlögregluþjónn hjá lögreglunni á höfuðborgarsvæðinu, segir í samtali við DV að tilkynning um málið hafi borist um klukkan 12:45. „Fyrstu viðbragðsaðilar eru komnir á vettvang, á þennan upphafsstað sem er við Hrafnhóla,“ segir Ásgeir sem bætir við að allt tiltækt lið hafi verið kallað á vettvang, hvort sem um ræðir slökkvilið eða björgunarsveitir.