Óhætt er að segja að Sveinn Gestur Tryggvason, sem situr af sér dóm vegna andláts Arnars Jónssonar Aspar, vandi Halldóri Vali Pálssyni, forstöðumanni á Litla-Hrauni, ekki kveðjurnar á Facebook-síðu sinni. Sveinn Gestur má ekki vera á netinu en virðist hafa komist í 4G-samband á Hólmsheiði þangað sem Halldór flutti Svein Gest nýverið. Sveinn Gestur segir forstöðumanninn „tuskumenni“ og „heigul“.

Sveinn Gestur er sagður vera einn þeirra sem hafa mótmælt refsiaðgerðum Halldórs Vals einna háværast. Fangar fóru nýverið í verkfall, lögðu niður störf og hættu að mæta til náms, þar sem Halldór lokaði íþróttasalnum og takmarkaði heimsóknir barna. Það gerði Halldór vegna árásar þriggja fanga á 18 ára hælisleitanda. Er nú öllum föngum refsað fyrir ofbeldi hinna.

Heimildir DV innan fangelsisins herma að sá atburður hafi verið skrumskældur í fjölmiðlum. Pilturinn hafi verið laminn, ekki vegna þjóðernis hans heldur fremur vegna dólgsháttar hans við aðra fanga. Enn fremur hafi verið talað líkt og hálft fangelsið hafi átt þátt í árásinni meðan hið sanna sé að þrír menn hafi ráðist á piltinn. Föngum þyki því stórkostlega ósanngjarnt að öllum sé refsað fyrir þennan atburð sem örfáir fangar áttu þátt í.