„Um helgina tókst svindlurum að koma nokkuð af evruseðlum í umferð. Aðferðin sem að þeir beittu var að fara með háa seðla, 100 og 200 evrur og versla lítið eitt með þeim. Þeir herjuðu einna helst á sólarhringsverslanir, leiktækjasali og leigubíla. Þetta var hópur sem fór víða.“
Þetta segir í tilkynningu sem lögreglan á höfuðborgarsvæðinu birti á Facebook. Eins og DV greindi frá á mánudag hefur nokkuð verið um falsaða evruseðla hér á landi að undanförnu. Nú hefur lögregla varpað frekara ljósi á málið, en þar segir að svindlararnir hafi farið stuttar ferðir með leigubílum eða keypt sígarettur og smávörur en fengu svo afgang í íslenskum krónum. Þannig tókst þeim að verða sér úti um talsverða peninga, að sögn lögreglu.
„Fljótt á litið eru þetta sambærilegir seðlar evrum. En þeir standast enga nánari skoðun ef menn vita að hverju á að leita. Svo virðist sem að svindlararnir hafi verið með búnt af fölskum seðlum sem hægt er að kaupa í Rússlandi.“
Rannsókn lögreglu í þessu máli miðar vel áfram. Í færslu lögreglu á Facebook fylgja meðal annars myndir og skýringar á því hvernig má greina þessa seðla frá alvöru seðlum:
