Barry Maxey og Michelle Smith frá Englandi voru meðal ferðamannana í ferð Mountaineers of Iceland sem þurfti að bjarga í storminum á þriðjudag. Þau eru komin heim til Englands og deila sögu sinni með The Cumberland News.
„Við lögðum af stað um hádegi og vorum komin að íshellinum um tvö. Stormurinn skall á um þrjú sem stytti ferðina okkar. Fyrirtækið vissi af yfirvofandi stormi en ákvað engu að síður að fara í ferðina.”
„Síðan liðu klukkustundirnar án þess að storminn lægði svo við neyddumst til að grafa okkur skjól úr snjó og þjappa okkur saman til að halda á okkur hita”
Barry og Michelle segja klukkustundirnar í storminum hafa verið skelfilegar og óttuðust þau um líf sitt.
„Það voru fjórir einstaklingar frá Brasilíu með okkur, þar á meðan 15 ára drengur. Þar sem við komum frá Cumbria vissum við að aðstæður gætu orðið erfiðar svo við vorum með mikið af fatnaði með okkur. Ég vafði drenginn inn í föt af mér, til að halda á honum hita,” sagði Barry.
„Það var ískalt. Ég hélt að við hefðum þetta ekki af í ljósi þess hversu lengi við vorum þarna og hversu slæmur stormurinn var.”
„Hjálp barst þó að lokum og við þurftum öll að leiðast í gegnum svartniðamyrkur að lítilli rútu. Við komum svo heim á hotel klukkan tvö um nóttina.”
Barry telur æðri mátt hafa vakað yfir þeim Michelle þennan dag og segja íslensku björgunarsveitirnar og rauða krossinn frábær og hafi reynst þeim vel.
Honum þykir þó verulega athugavert að fyrirtækið hafi ákveðið að fara í þessa ferð og hafi þar að auki haft engan búnað til að nýta í neyðartilvikum.
Einnig gagnrýnir hann það að starfsmenn hafi ekki haft samband við neyðaraðila fyrr en klukkan níu um kvöldið, sex tímum eftir að stormurinn skall á.
„Ég er gáttaður á því að virt fyrirtæki sem þetta, hafi ekki tekið neinn aukabúnað til að nýta í neyðartilvikum. Það vekur líka áhyggjur að þeir hafi beðið þetta lengi með að óska eftir hjálp.“
„Ég fékk frostbit og Michelle slasaðist á ökla“
Michelle og Barry ætla að ráða lögmann til að leita réttar síns gegn Mountaineers of Iceland.
