Miklir skógareldar hafa valdið stórfelldu tjóni í Ástralíu og ekki sér fyrir endann á hörmungunum. Talið er að um milljarður dýra hafi drepist í hörmungunum. Mörg eru slösuð og ungviði móðurlaust. Þeirra á meðal er fjöldi pokadýra sem eiga nú um sárt að binda. Pétur Oddbergur Heimisson og Erin Jade Turner stóðu fyrir uppákomu á Kex hostel í vikunni þar sem ákalli ástralskra dýraverndunarsamtaka var svarað í formi þess að prjóna poka fyrir pokadýr í Ástralíu. Viðburðurinn vatt þó upp á sig þar sem margir hafa sýnt framtakinu áhuga.

„Ég er Ástrali (frá Sidney) í Reykjavík. Ég kom fyrst til Íslands árið 2013 og hér hef ég búið meirihluta síðustu fimm ára ásamt maka mínum. Ég flaug frá Íslandi til Ástralíu í byrjun desember. Þegar ég yfirgaf Ástralíu var Sidney þakin þykkum reyk og aska féll frá himnum. Ég hef svo fylgst með aðstæðum versna frá Íslandi,“ skrifaði Erin á Facebook-síðuna Skógareldarnir í Ástralíu – Prjónað fyrir dýrin í Ástralíu.

Erin segir viðbrögð við prjónaátakinu hafa verið mjög góð. „Viðbrögðin sem við höfum fengið frá öllum landshlutum eru dásamleg og ég (fyrir hönd Ástrala) get ekki þakkað ykkur nægilega mikið.“

Þeir sem vilja leggja pokadýrunum lið geta farið á fyrr nefnda Facebook síðu, en þar er að finna uppskriftir að pokunum ásamt leiðbeiningum.

Erin og Pétur munu taka á móti pokum á Kex hostel þann 3. febrúar frá milli klukkan 10 og 20. Nánari upplýsingar er að finna á Facebook-síðunni.