Fyrirtækið Mountaineers of Iceland hefur vakið mikla athygli í fjölmiðlum í dag eftir að greint var frá því að fyrirtækið hafi flutt 40 manns á Langjökul í gær þrátt fyrir slæmar veðurviðvararnir. Björgunarsveitarmenn þurftu að bjarga fólkinu í gærkvöldi en 300 manns frá sveitinni tóku þátt í björgunaraðgerðunum.

RÚV náði tali við Hauk Herbertsson, rekstrarstjóra fyrirtækisins, en hann viðurkennir að mistök hafi átt sér stað. Hann segir að starfsmenn hafi gert sér grein fyrir aðstæðum, en haldið að ferðalagið væri búið áður en Vonda veðrið myndi skella á. Einnig hélt Haukur því fram að ástæðan fyrir því að ferðinni yrði ekki aflýst hefði ekkert með peninga að gera.

„Við vorum meðvitaðir um það og okkar áætlanir voru að vera farnir af svæðinu áður en þetta veður kæmi,“

Sjá einnig: Starfsmaður Mountaineers of Iceland sagði blaðamanni að „grjóthalda kjafti“

Þetta snerist ekki um peninga, þetta snerist meira um að klára þessa ferð fyrir þetta fólk sem við töldum að væri vel mögulegt.“

Mistökin voru að mati Hauks að heimsækja íshelli í Langjökli. Hann segir að mögulega hafi fleiri mistök átt sér stað sem hann er ómeðvitaður um að svo stöddu.

„Við gerðum klárlega mistök með því að fara inn í íshellinn. Við gerðum hugsanlega fleiri mistök. Á þessum tímapunkti veit ég ekki hver þau öll eru,“

Haukur segir að fremsti leiðsögumaðurinn hafi farið að sækja snjótroðara sem hefði átt að bjarga fólkinu. Troðarinn hafi síðan bilað.

Þegar að fréttamaður spurði hauk hvort að markmiðið hafi verið að sleppa því að kalla á björgunarsveitir svaraði Haukur játandi.

„Já, raunverulega ætluðum við ekki að kalla til björgunarsveitir nema þess þyrfti.“

„Um leið og okkur var ljóst að snjótroðarinn væri með gangtruflanir þá hefðum við átt að kalla til björgunarsveitir.“

Haukur heldur því fram að Mountaineers hafi ekki stefnt fólkinu í hættu, þar sem að allt hafi verið reynt til að tryggja öryggi þess. Hann segir þó að fyrirtækið og starfsmenn þess séu miður sín vegna málsins.

„Við erum öll gjörsamlega miður okkar yfir þessu,“