Hinn þekkti baráttumaður og þjóðfélagsrýnir, Jón Valur Jensson, er látinn, sjötugur að aldri. Að sögn náins aðstandanda lést hann í svefni aðfaranótt sjötta janúar. Dánarorsök er ókunn en Jón Valur hafði glímt við háan blóðþrýsting um skeið.

Jón Valur var lærður guðfræðingur, starfaði um tíma sem prófarkalesari á Morgunblaðinu, var ötull ættfræðigrúskari, ljóðskáld og landsþekktur fyrir þátttöku sína í þjóðmálaumræðunni. Jón Valur var talsmaður kristinna og íhaldssamra gilda, andstæðingur Evrópusambandsins og með með sterka þjóðernistaug. Hann tjáði sig í rituðu máli, í símatímum útvarpsstöðvarinnar Útvarp Saga og á mótmælafundum á Austurvelli. Skrif sín birti Jón Valur gjarnan á Moggablogginu.

DV sendir ástvinum Jóns Vals innilegar samúðarkveðjur.