Björgólfur Jóhannsson, starfandi forstjóri Samherja, telur að Namibíumálið muni fá sama endi fyrir Samherja og Seðlabankamálið. Í Seðlabankamálinu, þar sem Samherji var sakaður um brot á gjaldeyrislögum, var ekki ákært og málið fellt niður. Björgólfur telur að það sama gerist í mútumálinu sem skók þjóðfélagið seint á síðasta ári og komst í heimsfréttirnar en gögn sem Wikileaks komst yfir og framburður fyrrverandi starfsmanns Samherna, Jóhannesar Stefánssonar, bentu til þess að Samherji hefði varið næstum milljarði króna í mútugreiðslur til háttsettra manna til að komast yfir markrílkvóta í lögsögu Namibíu.

Stundin greinir frá ummælum Björgólfs í málinu og vísar til fréttar blaðsins Fiskeribladet.

Í svari til norska blaðsins segir Björgólfur að fréttaflutningur af málinu sé fullur af rangfærslum en gerir ekki grein fyrir meintum rangfærslum. Björgólfur telur að þegar öll gögn liggja fyrir í málinu verði Samherji hreinsaður af ásökunum. Hann gerir hins vegar ekki nánari grein fyrir því í svari sínu.