Þrír eigendur (og bræður) Frysti og kæliþjónustunnar, Vagnhöfða 10, og bókari félagsins, eru ákærðir fyrir stórfelld skattalagabrot, bókhaldsbrot og peningaþvætti í tengslum við skattframtöl og bókhaldsögn fyrirtækisins sem og skattframtal stjórnarformanns fyrirtækisins.

Frysti- og kæliþjónustan var stofnuð árið 2010 og framleiðir kæli- og loftræstibúnað fyrir fyrirtæki. Lítið sem ekkert kynningarefni er að finna um fyrirtækið á netinu en upplýsingar eru um það í fyrirtækjaskrá Ríkisskattstjóra og öðrum opinberum gögnum.

Ákærurnar beinast einnig gegn öðrum fyrirtækjum með sama heimilisfang og svipuð heiti: Fyrsting ehf, Kæli- og Frystiþjónustan ehf, Kælir ehf, Kæliþjónustan ehf, Legus ehf og Refco ehf. Eru þessir sömu aðilar forráðamenn og stjórnarmenn í öllum fyrirtækjunum.

Stjórnarformaður fyrirtækisins og endurskoðandi hans eru ákærðir fyrir að hafa vantalið tekjur stjórnarformannsins árin 2010-2011 og hann vangreitt tekjuskatt upp á samtals 17,5 milljónir króna. Þess skal getið að Frysti- og kæliþjónustan var rekin á kennitölu mannsins.

Ennfremur eru bræðurnir og endurskoðandinn ákærðir fyrir að vangreiða virðisaukaskatt og tekjuskatt af rekstri fyrirtækjanna sem hér um ræðir frá tímabilinu 2009 til 2014 og nema þessi brot öll samtals nokkrum tugum milljóna króna.

Þá eru aðilarnir sakaðir um bókhaldsbrot með því að bókhald fyrirtækjanna hafi ekki gefið rétta mynd af rekstri þeirra.

Ennfremur eru mennirnir sakaðir um peningaþvætti með því að hafa aflað Frysti- og kæliþjónustunni ávinnings af refsiverðum brotum þar sem rekstrartekjur fyrirtækisins höfðu ekki verið taldar fram til skatts og því ekki greiddur skattur af þeim í samræmi við ákvæði skattalaga, samtals að fjárhæð tæpar 25 milljónir.

Stjórnarformaðurinn er ákærður fyrir meiriháttar brot gegn skattalögum og fyrir peningaþvætti með því að hafa staðið skil á efnislega röngum skattframtölum gjaldárin 2012 til 2015 vegna tekjuáranna 2011 til og með 2014.

Enn fremur er þess krafist að fyrirtækin sem í hlut eiga sæti upptöku fjármuna sem nemur þessum brotum.

Málið verður þingfest í Héraðsdómi Reykjavíkur á morgun.