Appelsínugul viðvörun er í gildi víða um land vegna versnandi veðurs á morgun. Viðvörunin tekur til Suðurlands, Faxaflóa, Breiðafjarðar og Miðhálendis. Þá er gul viðvörun í gildi í dag á Norðurlandi eystra, Austurlandi að Glettingi, Austfjörðum og Suðausturlandi. Veður þar gengur niður í kvöld en á morgun fer aftur að hvessa.
Búast má við því að það fari að hvessa verulega á Suðurlandi strax í fyrramálið. Veðurstofan gerir ráð fyrir suðaustan stormi eða roki með snjókomu og síðan slyddu. Vindur verður á bilinu 18 til 25 metrar á sekúndu og geta íbúar í öllum landshlutum búist við heldur leiðinlegu veðri á morgun; snjókomu og hvössum vindstrengjum með tilheyrandi skafrenningi og lélegu skyggni.
Búist er við því að veðrið gangi niður um allt land um kvöldmatarleytið á morgun.
„Lélegt skyggni og akstursskilyrði slæm. Búast má við mjög hvössum og varhugaverðum vindhviðum við fjöll, staðbundið yfir 40 m/s, einkum undir Eyjafjöllum. Hægari vindur og úrkomuminna í uppsveitum. Búast má við samgöngutruflunum og fólki bent á að sýna varkárni og fresta ferðalögum fram yfir gildistíma viðvöruninnar,“ segir á vef Veðurstofunnar um þau svæði þar sem appelsínugul viðvörun er í gildi.
Gul viðvörun er í gildi á höfuðborgarsvæðinu í fyrramálið. Hún gildir frá klukkan 9 til 14 þegar þetta er skrifað.
„Suðaustan hvassviðri eða stormur 15-23 m/s, snjókoma og skafrenningur með lélegu skyggni og versnandi akstursskilyrðum. Mjög hvasst og hviðótt í efri byggðum og einnig á leiðum sem liggja frá borginni, t.d. á Kjalarnesi, Hellisheiði og á Reykjanesbraut. Veðrið gengur fremur hratt yfir.“
