Skúli Mogensen hefur ekki snert við Tesla-bifreið sinni sem hann lagði í Áslandshverfi í Hafnarfirði frá því um mánaðamótin október – nóvember. Heiðarás er ansi langt frá heimili Skúla sem býr á Seltjarnarnesi. Hringbraut greinir frá þessu.

Skúli á að haf mætt í teiti í götunni á Tesla-bílnum, en síðan tekið leigubíl heim. Samkvæmt frétt Hringbrautar eru íbúar orðnir þreyttir á þessu afskiptaleysi Skúla. Þetta er haft eftir einum íbúa götunnar:

„Fyrstu vikurnar var þetta bara fyndið og var í raun skemmtileg saga. Núna er farið að renna okkur tvær grímur og maður er farinn að átta sig á að þetta orðinn dónaskapur og sýnir virðingarleysi gagnvart náunganum. Það eru margir í götunni orðnir mjög ósáttir.“

Bíllinn er af gerðinni Tesla Model S, en umrætt eintak var eitt það fyrsta hérlendis.