Einar Sveinbjörnsson veðurfræðingur á von á því að veðrið hér á landi í janúar verði ekki upp á marga fiska. Hann á von á því að hálfgert ruddaveður verði á landinu næstu vikurnar, eða að minnsta kosti til 20. – 25. janúar næstkomandi.
Einar heldur úti veðurvefnum Blika.is þar sem hann birtir reglulega hugleiðingar sínar og veðurspár. Einar segir að straumhvörf hafi orðið í lofthringrásinni við Norður-Atlantshaf í lok desembermánaðar.
„Í stað ríkjandi Grænlandshæðar og lítillar V-áttar í háloftunum hefur myndast öflugur heimskautahvirfill norðvestur af Grænlandi. Hann hefur nú tekið stjórnina og keyrir upp vestanvindinn. Við höfum þegar fengið smjörþefinn af þessum umskiptum með útsynningi á nýársdag og þennan morguninn einnig,“ segir hann.
En hvernig verður veðrið þá á næstu vikum?
„Hálfgert ruddaveður hér á landi, djúpar lægðir, stormar, úrkomu- og snjóatíð sem og sviptingar í hita. V- og SV-áttir verða tíðari og á kostnað A-lægra vinda sem hafa verið ríkjandi hér nánast í allt haust. Að sama skapi fylgir þessari gerð hringrásar milt veður með austurströnd N-Ameríku og eins í V-Evrópu. Kalt hins vegar á Grænlandi og „lekar“ tíðir af kalda loftinu í vestri í formi háloftalægða með snjó- og éljabökkum.“
Einar segir að von sé á djúpri lægð um helgina með tilheyrandi leysingum en útsynningurinn sýni sig eftir helgina með kólnandi veðri.
Einar segir að út frá ýmsum hringrásarvísum á norðurhveli jarðar og eins við miðbaug og tengslum þar á milli megi ætla með sæmilegri vissu að lægðagangur með sterkri vestanátt í háloftunum verði ríkjandi til að minnsta kosti 20. til 25. janúar næstkomandi.
Veðurhorfur á landinu næstu daga samkvæmt spá Veðurstofu Íslands:
Á laugardag:
Gengur suðaustan 18-25 m/s með snjókomu og síðar slyddu eða rigningu. Hlýnandi veður. Snýst í suðvestan 10-18 seinnipartinn með skúrum eða slydduéljum, en léttir til norðaustanlands.
Á sunnudag:
Suðvestanátt, víða 13-18 m/s. Bjartviðri A-lands, annars skúrir eða él. Hægari síðdegis og hiti um frostmark, en vaxandi suðaustanátt syðst um kvöldið.
Á mánudag:
Breytileg átt, hvass vindur á köflum. Slydda eða rigning og hiti 1 til 6 stig, en snjókoma og kólnar V-til á landinu um kvöldið.
Á þriðjudag og miðvikudag:
Suðvestanátt með éljum, en úrkomulítið á NA-verðu landinu. Kólnandi veður.
