Katrín Jakobsdóttir forsætisráðherra minnist Guðrúnar Ögmundsdóttur með hlýjum orðum í færslu á Facebook-síðu sinni. Guðrún lést á nýársdag, 69 ára að aldri, eftir baráttu við krabbamein.

„Guðrún Ögmundsdóttir var ein þeirra stjórnmálamanna sem naut virðingar þvert á flokka og átti vini í ólíkum kimum samfélagsins. Hún var ötul baráttukona fyrir mannréttindum og jafnrétti og hreif fólkið í kringum sig með sér í þeirri baráttu. Ég kynntist henni bæði á vettvangi stjórnmálanna og stjórnarráðsins og alltaf tók hún mér með hlýju og gleði af því að hún var manneskja með stórt hjarta sem sannanlega gerði heiminn betri. Hennar verður sárt saknað,“ segir Katrín.

Guðrún sat bæði á Alþingi og í borgarstjórn. Hún vann auk þess ýmis önnur störf, en hún var til dæmis í stjórn fjölda félaga á lífstíð sinni.

Fjölmargir hafa minnst Guðrúnar með fallegum orðum undanfarinn sólarhring. Egill Helgason, fjölmiðlamaður sagði til dæmis:

„Gunna var raunar þeirrar gerðar að hún gat talað við alla, háa sem lága, hún fór ekki í manngreinarálit, hún gat átt samskipti við andstæðinga sína í pólitík – öllum líkaði vel við Gunnu, mátu heiðarleika hennar, hreinskiptni – og svo auðvitað húmorinn.

Ég held ég hafi aldrei heyrt neinn mann tala illa um Guðrúnu Ögmundsdóttur. Pólitíkin væri betri ef væri fleira fólk eins og hún. Hún vildi vel.“