Icelandair er í klónum á siðlausum stjórnendum Boeing og MAX flugvélarnar frá Boeing eru drápstæki, að mati Stefáns Einars Stefánssonar, viðskiptaritstjóra Morgunblaðsins. Í áramótapistli Stefáns þar sem hann fer yfir sviðið í atvinnu- og efnahagslífi landsins er að finna mjög harðorðan og beinskeyttan kafla um samskipti Boeing flugvélaframleiðandans og Icelandair. „Óhamingju Icelandair verður allt að vopni,“ segir í yfirskrift kaflans og þar segir:

„Þá þurfa Íslendingar að halda vökulu auga á því sem nú á sér stað í Renton-verksmiðjunni í Washington-fylki í Bandaríkjunum. Icelandair Group, sem er hryggjarstykkið í íslenskri
ferðaþjónustu, og raunar fólksflutningum til og frá landinu, er í spennitreyju sem félaginu var komið í af siðlausum stjórnendum Boeing. Þeir styttu sér leið og lentu í keldunni, sem krókurinn hefði forðað þeim frá, þegar þeir settu í loftið stórgallaða og lífshættulega flugvél sem ber einkennisstafina MAX. Óhamingja Icelandair reyndist sú að undirrita samninga um kaupá 16 slíkum vélum árið 2013. Kyrrsetning drápstækjanna frá því í mars hefur valdið félaginu og íslensku hagkerfi gríðarlegum búsifjum og ekki sér enn fyrir endann á því öllu. Jafnvel gæti komið til þess að þessar vélar fari aldrei aftur í loftið sökum hönnunargalla sem nær ómögulegt mun reynast að bæta úr.“

Stefán segir eðlilegt skref hjá Icelandair að ganga til samninga við Airbus meðal annars vegna framkomu forsvarsmanna Boeing en auk þess henti Airbus mun betur inn í leiðakerfið félagsins en Boeing-vélarnar. Hann segir að lokum:

„Hið sorglega er að Icelandair hefur tapað gríðarlega verðmætum tíma á þessu MAXævintýri og það gæti tekið mörg ár að vinda ofan af þeirri pattstöðu sem upp er komin.“