Í gærkvöldi voru fjórir aðilar handteknir grunaðir um þjófnað á flugeldum sem stolið var frá Hjálpasveit Skáta í Kópavogi og verða þeir yfirheyrðir í dag.

Þetta kemur fram í tilkynningu frá lögreglu en innbrotið átti sér stað yfir jólin. Brotist var inn í gám sem stóð á lóð björgunarsveitarinnar og er talið að þjófarnir hafi notast við slípirokk. Talið er að verðmæti flugeldanna hafi hlaupið á milljónum króna.

Í tilkynningu frá lögreglu segir að við húsleit hafi flugeldarnir sem leitað var að fundist og hefur sveitin því fengið sitt til baka. Fleiri munir fundust við leitina sem taldir eru tengjast öðrum innbrotum.

Lögregla veitir ekki frekari upplýsingar um málin.