„Ég veit að þetta var íkveikja. Þú mátt alveg hafa það eftir mér. Öll verksummerki æpa á það en það var kveikt í á tveimur stöðum,“ segir Anna Kristbjörg Jónsdóttir, íbúi í Vesturbergi 4, en þar varð mikill eldsvoði á föstudag. Eldurinn kviknaðí í geymslurými á neðstu hæð. Hann var slökktur áður en hann náði að berast inn í búðir hússins en þær skemmdust af reykmengun og eru óíbúðarhæfar í bili. Gangurinn í húsinu er illa farinn og sótsvartur.
Málið er til rannsóknar hjá tæknideild Lögreglunnar á höfuðborgarsvæðinu og frá lögreglunni er ekki aðrar upplýsingar að hafa í bili en að málið sé til rannsóknar og eldsupptök ókunn á þessu stigi málsins.
Anna er þriggja barna móðir og hafði í engin hús að venda um jólin í fyrstu en fjölskyldan hefur undanfarið sofið hjá vinum og vandamönnum og hafa þau orðið að skipta sér niður á heimili. Annar tveggja katta fjölskyldunnar týndist í eldsvoðanum en er nú fundinn aftur. Það eru þó ekki einu gleðitíðindin mitt í þessum hörmungum heldur hefur fjölskyldan nú fengið íbúð til umráða yfir jólin. Var það aðili sem brást við eftir að hafa séð sjónvarpsviðtal við Önnu, sem bauð þeim afnot af íbúð.
„Hjarta mitt er fullt af þakklæti fyrir þessa góðmennsku,“ segir Anna. Jólagjafirnar verða nú sóttar í íbúðina í Vesturberg og fluttar ásamt ýmsu öðru dóti til jólahaldsins í lánsíbúðina. „Maður gerir eitthvað úr þessu,“ segir Anna vongóð og má segja að hún brosi í gegnum tárin. Ástandið er enn mjög slæmt í íbúðinni í Vesturbergi og til dæmis er allur fatnaður mettaður reykjarlykt.
Anna vill að lokum skila jólakveðju og þakklæti til allra sem sýnt hafa fjölskyldunni hlýhug á þessum erfiðu tímum.
Heimilislaus rétt fyrir jól vegna eldsvoða
