Magnús Guðmundsson, eða Maggi Peran eins og hann kallar sig, er mörgum Íslendingum velkunnur en hann nýtur talsverða vinsælda á samfélagsmiðlum. Hann hefur þó ekki átt sjö dagana sæla undanfarið því hann lenti alvarlegu slysi á dögunum.
Í viðtali við DV í fyrra þá ræddi hann um stríð sitt við offitu. Að lokum lagðist hann undir hnífinn í aðgerð sem kallast magaermi. Aðgerðin er nokkuð umdeild enda hafa sex einstaklingar látið lífið eftir slíka aðgerð. Allt gekk þó að óskum hjá Magga og aðgerðin átti eftir að breyta lífi hans. Þar síðasta sumar hafði hann lagt af 60 kíló.
Sjá einnig: Maggi Peran fór í umdeilda aðgerð og missti 60 kíló
Maggi segir frá þessu á Facebook en hann hefur gefið DV góðfúslegt leyfi til að greina frá slysinu. „Korter í jól….. rann ég í hálku og rotaðist. Fluttur með sjúkrabíl með bláum ljósum á blikki yfir heiðina. Brot í höfuðkúpu, blæddi inn á heila, illa farinn á mjöðm og kjálka. Verð hér fram á aðfangadag. Kemst vonandi heim í tæka tíð til að elda rjúpurnar,“ segir Maggi.
Hann segir þó að eiginkona hans hlúi vel að honum. „Jenny Hildur stjanar við mig og börnin gràta. Vilja pabba heim um jólin. Takk fyrir alla fallegu póstana,“ skrifar Maggi og er óhætt að segja að batakveðjum rigni yfir hann í athugasemdum.
