Vilborg Arna Gissurardóttir, pólfari, féll í kvöld úr keppni í þættinum Allir get dansað. Hún og Daði Freyr dönsuðu samba. Þau höfðu bara fjóra daga til undirbúnings en fyrri dansfélagi Vilborgar, Javi Fernández, var rekinn úr þættinum.

DV greindi frá því fyrir skömmu og samkvæmt heimildum DV var óánægja Vilborgar helsta ástæðan fyrir brottrekstri Javis. Upp hafi komið aðstæður þar sem Javi hafi í einhver skipti þurft að mæta seinna á æfingar en það hafi verið vegna skuldbindinga hans við nemendur sína en Javi starfar einnig sem danskennari. Það hafi komið illa við Vilborgu Örnu sem stundum hafi ekki treyst sér til þess að mæta á dansæfingarnar sjálf vegna pirrings.

Vilborg Arna fór hins vegar fögrum orðum um Javi í kvöld og sagði: „Því miður fór það þannig að hann Javi er horfinn á braut. Hann er náttúrulega yndislegur strákur og skemmtilegur. Ég lærði helling af honum og þakka honum kærlega fyrir samstarfið.”