„Okkur líður ömurlega. Ég er að vonast eftir því að geta haldið jólin heima en mér finnst það ekki líklegt miðað við hvernig þetta er útlítandi núna,“ segir Anna Kristjbjörg Jónsdóttir, íbúi í Vesturbergi 4, sem er fjölbýlishús á fjórum hæðum, en allt húsið var rýmt í kjölfar eldsvoða sem kviknaði í geymslurými á neðsta hæð hússins á tíunda tímanum í morgun.

Eldurinn náði ekki að teygja sig inn í íbúðirnar en þær skemmdust af reyk. „Gangurinn er allur ónýtur og það eru svartir veggir alveg upp að efstu hæð,“  sagði Anna í viðtali við DV. Hún segist hafa fengið snert af reykeitrun en andlega líðanin er verri þar sem skipta þarf fjölskyldunni niður í gistingu hjá vandamönnum í nótt og ólíklegt er að fjölskyldan geti haldið jól á heimili sínu miðað við ástand hússins í augnablikinu. Það er alltaf ömurlegt að þurfa að yfirgefa heimili sitt vegna eldsvoða en líklega aldrei verra en rétt fyrir jól.

„Við vorum föst inni í einu herbergi, öll fjögur og einn hundur. Við komumst ekki út á svalir, það var svo mikill reykur, við komumst ekki fram og þurftum að loka okkur inni í einu herbergi. Það var allt húsið rýmt og okkur komið fyrir úti í Fellaskóla,“ segir Anna sem reynir ásamt fjölskyldu sinni að ná áttum eftir þennan hræðilega atburð sem meðal annars setur jólahald fjölskyldunnar í uppnám. Þau reiða sig hins vegar á aðstoða góða vina og ættingja og gistingu er borgið fyrir nóttina.

„Þetta er hryllingur,“ bætir Anna við döpur.

Eldsupptök er ókunn.