Landsnet hefur sent frá sér yfirlit um stöðu flutningskerfisins, en eins og kunngt er hefur verið rafmagnslaust víða eftir óveðrið í síðustu viku. Viðgerðarhópar hafa haft í nógu að snúast undanfarna daga og enn er unnið að viðgerðum víða, til dæmis á Dalvíkurlínu en viðgerð þar gengur vel.

Hér má sjá yfirlit Landsnets um stöðuna í hádeginu, þann 17. desember:

Tengivikið við Reykjanesvirkjun / Suðurnesin.

Vegna seltu við tengivirki okkar við Reykjanesvirkjun þarf að taka úr rekstri Rauðamelslínu 1 milli Rauðamels og Reykjanesvirkjunar svo unnt verði að hreinsa tengivirkið. Báðar vélar Reykjanesvirkjunar verða úr rekstri á meðan en við eigum ekki von á straumleysi hjá almennum notendum á svæðinu.

Tengivirkið í Hrútatungu

25 manna hópur frá okkur og Rafal vann við að þrífa einangrara virkisins í fyrrinótt frá miðnætti og fram til kl. 4:00. Eftir það áttum við enn í erfiðleikum með að halda spennu á virkinu, en það tókst að lokum og hefur það verið í rekstri frá því rúmlega 6 í gærmorgun. Vegna tíðra útslátta á virkinu undanfarið, þá verðum við tiltæk á svæðinu eitthvað áfram.

Dalvíkurlína 1

Vinna gengur vel við lagfæringar á línunni. Allar stæður komnar upp og byrjað er að hengja upp leiðara. Ef vinna gengur áfram vel á morgun eru allar líkur á því að áætlanir standist og að línan verði komin í rekstur á miðvikudaginn. Í gærkvöld, við lok vinnudags, var öllum viðbragðs- og viðgerðaraðilum, sem hafa unnið sleitulaust við hjálpar- og viðgerðarstörf, boðið í menningarhúsið á Dalvík til að þiggja veitingar í boði íbúa. Sveitarstjórinn þakkaði þessum aðilum fyrir sitt framlag og það er frábært að finna hvernig íbúar sveitafélagsins hafa tekist á við rafmagnsleysið og erfiðleikana sem því fylgja, af mikilli jákvæðni.

Kópaskerslína 1

Línan er í rekstri frá Laxá og Þeistareykjum að Lindarbrekku og tengipunkti við fiskeldisstöð í Öxarfirði, sem er um 15 km suður af Kópaskeri. Viðgerð á línuhluta næst Kópaskeri hófst af fullum krafti í dag. 20 manna hópur sér um að hreinsa leiðara og undirbúa staurauppsetningu, en reising á nýjum staurum hefst í dag. Þá bætast nokkrir reynsluboltar í viðgerarteymið í dag, en þeir koma beint úr viðgerð á Dalvíkurlínunni. Áætlað er að vinnu við línuna verði lokið um komandi helgi.

Húsavíkurlína 1

Viðgerð á línunni gekk vel í gær og er áætlað að henni ljúki í kvöld.

Laxárlína 1

Beðið verður með viðgerð um sinn meðan unnið er við lagfæringar á öðrum línum.